May puwang ang himagsikan sa lipunang puno ng pananamantala.

Habang ang nasa tuktok ay nagpapakasasa sa yamang ninakaw mula sa kaban ng bayan, pagkalam ng sikmura, kawalan ng trabaho at ‘di-aksesibleng edukasyon ang araw-araw na binubuno ng masang pinagsasamantalahan. Walang tunay na hustisya hangga’t may naghahari-hariang uri, samantalang ang nakararami ay biktima pa rin ng sistemang pumapabor lang sa iilan.

Hindi maitatanggi ang danas ng masang patuloy na naghihirap. Sa taong ito lamang, sunod-sunod ang anyo ng pagpapahirap na idinulot ng pangungurakot at kapabayaan ng mga opisyal ng pamahalaan — mula sa mga anomalya sa flood control projects, labis-labis na pondo para sa imprastrukturang hindi napapakinabangan ng taumbayan, hanggang sa kawalan ng disenteng kabuhayan. Lahat ng ito’y patunay ng lumalalim na agwat sa pagitan ng mayayaman at mahihirap, at ng sistemang sadyang hindi nakalaan para sa kapakanan ng masa.

Ngayong Araw ni Bonifacio, nakikiisa ang Union of Journalists of the Philippines – UP sa paggunita sa kaniyang mithiing palayain ang bayan mula sa mga mapang-abusong mananakop. Gayundin, kaisa rin kami sa patuloy na pagsasabuhay sa diwa ng makabagong rebolusyong pinunla ni Bonifacio — siyang tuntungan ng himagsikan ng masang api upang panagutin ang ‘di-magkaisang tambalan nina Marcos at Duterte na parehong ipinagkanulo ang interes ng masa at nagpailalim sa dikta ng mga imperyalista.

Kaya’t tumungo na sa lansangan. Itaas ang kamao. Makiisa sa masang sisingilin ang rehimeng lulong sa pandarambong!